கேகாலை மாவட்டத்தின் சிறுவர் மற்றும் மகளிர் அபிவிருத்தித் துறையுடன் தொடர்புடைய மாவட்ட சிறுவர் மற்றும் மகளிர் அபிவிருத்தி உபக்குழுக் கூட்டம் நேற்று (16) கேகாலை மாவட்டச் செயலக மாநாட்டு மண்டபத்தில் நடைபெற்றது.

இக்கூட்டம் கேகாலை மாவட்ட நாடாளுமன்ற உறுப்பினரும் மாவட்ட சிறுவர் மற்றும் மகளிர் அபிவிருத்தி உபக்குழுவின் தலைவருமான திருமதி சாகரிகா கங்கனி அதுகோரல அவர்களும், கேகாலை மாவட்டச் செயலாளர் திரு ஜி. எஸ். நிஷாந்த அவர்களும் தலைமையில் நடைபெற்றது.

மாவட்ட சிறுவர் மற்றும் மகளிர் அபிவிருத்தித் துறையுடன் தொடர்புடைய பிரச்சினைகள், தேவைகள் மற்றும் முன்மொழிவுகள் குறித்து கலந்துரையாடுதல், மாவட்ட ஒருங்கிணைப்புக் குழுவிற்கு சமர்ப்பிக்க வேண்டிய விடயங்களை அடையாளம் காணுதல், அங்கு எடுக்கப்படும் தீர்மானங்களை உள்ளூராட்சி மற்றும் தேசிய மட்டங்களில் நடைமுறைப்படுத்துதல் ஆகியவை இவ்வுபக்குழுவின் முக்கிய நோக்கங்களாகும். இதன்போது 2026 ஆம் ஆண்டின் முதல் மற்றும் இரண்டாம் காலாண்டு முன்னேற்ற அறிக்கைகளும் சமர்ப்பிக்கப்பட்டன.

முந்தைய உபக்குழுக் கூட்டத்தில் எடுக்கப்பட்ட தீர்மானங்களின் முன்னேற்றத்தை மீளாய்வு செய்தல், பிரதேச செயலக மட்டத்தில் தொழில்முனைவோர் தரவுத்தளத்தை உருவாக்குதல், மகளிர் தொழில்முனைவோரின் உற்பத்திப் பொருட்களை ரங்வல நெசவு மையத்திற்கு அறிமுகப்படுத்துதல், பிரதேசத்தின் அபிவிருத்தி திறன்களை அடையாளம் காண ஆய்வுகளை மேற்கொள்ளுதல், கர்ப்பிணித் தாய்மார்களுக்கு வழங்கப்படும் ஊட்டச்சத்து பொதித் திட்டத்தை முறையாக நடைமுறைப்படுத்த கருக்கலைப்பு மற்றும் குழந்தைப் பிறப்பு தொடர்பான தகவல்களைப் பெறுதல், மேலும் பிரதேச செயலக மட்டத்தில் பிறப்புச் சான்றிதழ் இல்லாத குழந்தைகளுக்கு பிறப்புச் சான்றிதழ் வழங்குதல் தொடர்பாகவும் கலந்துரையாடப்பட்டது.

நன்னடத்தை (Probation) அலுவலகங்களுடன் தொடர்புடைய விடயங்கள், சிறுவர் பாதுகாப்பு தன்னார்வ இல்லங்கள், அரச சிறுவர் இல்லங்கள் மற்றும் தடுப்பு இல்லங்களில் காணப்படும் பிரச்சினைகள், பாடசாலை மாணவர்களிடையே அதிகரித்து வரும் போதைப்பொருள் மற்றும் நச்சுப்பொருள் பாவனையைத் தடுப்பதற்கான நடவடிக்கைகள், பாடசாலைகளைச் சுற்றியுள்ள பாதுகாப்பற்ற பகுதிகள் தொடர்பாகவும் விரிவாக ஆராயப்பட்டது.

மேலும், கிராம மட்டத்தில் செயற்பட்டு வரும் மகளிர் சங்கங்கள் ஊடாக சிறுவர் பாதுகாப்பு தொடர்பான விழிப்புணர்வு செய்திகளை சமூகத்திற்கு கொண்டு செல்வது மற்றும் அவற்றின் பங்களிப்பை மேலும் வலுப்படுத்துவது குறித்தும் கவனம் செலுத்தப்பட்டது.

இந்நிகழ்வில் மேலதிக மாவட்டச் செயலாளர் (நிர்வாகம்) திரு குசும் பண்டார, உதவி மாவட்டச் செயலாளர் திருமதி மல்ஷா எல். பிரியதர்ஷனி, மாவட்டத் திட்டமிடல் பணிப்பாளர், மாகாண சபை மற்றும் மத்திய அரசின் அதிகாரிகள், மாகாணக் கல்விப் பணிப்பாளர் (முன்பள்ளி அபிவிருத்தி அதிகார சபை), வலயக் கல்விப் பணிப்பாளர்கள், மாவட்ட சுகாதார சேவைகள் பணிப்பாளர், மாவட்ட ஊட்டச்சத்து குழுவின் பிரதிநிதிகள், இலங்கை பொலிஸ் அதிகாரிகள் மற்றும் மாவட்ட மற்றும் பிரதேச செயலகங்களின் சிறுவர் மற்றும் மகளிர் அபிவிருத்திப் பிரிவு அதிகாரிகள் உள்ளிட்ட பலர் கலந்துகொண்டனர்.