அறிவியல் மற்றும் தொழில்நுட்ப அமைச்சின் வழிகாட்டுதலின் கீழ் கேகாலை மாவட்டச் செயலகத்தினால் ஏற்பாடு செய்யப்பட்ட கேகாலை மாவட்டக் கண்காட்சி மற்றும் புத்தாக்க ஆலோசனை முகாம் இன்று (26) கேகாலை மாநகர சபை மண்டபத்தில் ஆரம்பமானது.

அரசின் "வளமான நாடு – அழகான வாழ்க்கை" என்ற தேசியக் கொள்கைக் கட்டமைப்பிற்கு அமைவாக, உள்ளூர் மட்டத்தில் உருவாகும் நுண் மற்றும் சிறு அளவிலான தொழில்முனைவோரின் உற்பத்திகளை மேம்படுத்துதல், புத்தாக்கங்களை ஊக்குவித்தல், மேலும் புத்தாக்குனர்களுக்கும் புத்தாக்குனர்களாக விரும்புபவர்களுக்கும் தேவையான ஆதரவை வழங்குதல் என்பனவற்றை நோக்கமாகக் கொண்டு இந்நாள் முழுவதும் நடைபெறும் நிகழ்ச்சி ஏற்பாடு செய்யப்பட்டுள்ளது.

இந்நிகழ்வில் புத்தாக்கப் பொருட்களைக் கொண்ட கண்காட்சி மற்றும் புத்தாக்க ஆலோசனை முகாம் ஆகியவை சுற்றுச்சூழல் அமைச்சர் டாக்டர் தம்மிக்க படபந்தி, கேகாலை மாவட்ட பாராளுமன்ற உறுப்பினர் திருமதி சாகரிகா கங்கனி அதுகோரல மற்றும் கேகாலை மாவட்டச் செயலாளர்/அரசாங்க அதிபர் கே. ஜி. எஸ். நிஷாந்த ஆகியோரின் தலைமையில் உத்தியோகபூர்வமாக ஆரம்பித்து வைக்கப்பட்டது.

இந்நிகழ்வின் போது, கலிகமுவ விதாதா நிலையத்தைச் சேர்ந்த தொழில்முனைவோர் திருமதி நிலக்ஷி விஜேசிங்க அவர்களுக்கு GMP சர்வதேச தரச் சான்றிதழ் அடையாளமாக வழங்கப்பட்டது.

மேலும், மக்கள் வங்கியின் கடன் திட்டங்கள் தொடர்பான விழிப்புணர்வு நிகழ்ச்சியை மக்கள் வங்கியின் பிராந்திய முகாமையாளர் திரு உபுல் பண்டார வழங்கினார்.

பாடசாலை மாணவர்களுக்கும் தொழில்முனைவோருக்கும் பயன்படும் பல புதிய உற்பத்திகள் மற்றும் புத்தாக்க உபகரணங்கள் இக்கண்காட்சியில் காட்சிப்படுத்தப்பட்டிருந்தன.

இந்நிகழ்ச்சி கேகாலை மாவட்ட நிறைவேற்று அலுவலர் திரு சிதத் சங்கக்கார அவர்களின் ஒருங்கிணைப்பில், மாகாண செயலக அதிகாரிகளின் ஒத்துழைப்புடன் ஏற்பாடு செய்யப்பட்டது.

இந்நிகழ்வில் அறிவியல் மற்றும் தொழில்நுட்ப அமைச்சின் நிறைவேற்று பணிப்பாளர் திரு மனோஜி கருணாரத்ன, மேலதிக மாவட்டச் செயலாளர் (அரசாங்கம்) திரு குசும் பண்டார, ருவன்வெல்ல பிரதேச செயலாளர், உதவி மாவட்டச் செயலாளர், பிரதிப் பணிப்பாளர்கள், அரச அதிகாரிகள், தொழில்முனைவோர், பாடசாலை மாணவர்கள் உள்ளிட்ட பலர் கலந்து கொண்டனர்.